Kaosa Tertoqî

Kaos rût e, bibîne
Li rewşa xwe meyzêne
Çawa jiyaneke tertoqî8 dijî
Li her tiştî diterpilê û tu dikevê
Dikevê binpiya, bin zemînê, binê dojehê
Pora te spî bûye,
Çermê te reş
Ev çend sale ku te nanê tenûrê nexwariye gelo?
Ev tev kaos te diçilmisênê
An rastiyên jiyana ku nehatiye jiyîn
Ez deqerû me
Bêperde dibejim rastiyê
Bêparzûn direşênim azadiye
Hetîketî nîne ji bo dîna
Ji min re behna sîr û pîvazê wek misk û enberê ye
Ev civakên nexweş
Ev kesayetiyên nexweş
Ji kaosê dizin, ji kaosê diwelidin
Ji can û bedenê xwîn û avik diherikê
Ey mirovên pozbilind
Ji bîr neke ku tu ji dilopek avikî

Bêne bîra xwe
Wan laşên li kolanan bêxwedî mayî
Laşên tazî
Ku kuçikan ji goştê van têr dixwar
Pîsîkan ji xwîna wan divexwart
Û hestû li erdê diman
Lê nedihiştin ku zar li ser dayika xwe bigirî
Dayika xwe veşêrê nav axê
Dîsa bênê bîra xwe
Ji bo behnpênekevê bê çawa dayika zarokên xwe
Di cemedankan de dihilandin
Lê nedihiştin ku dayik zarê xwe veşêrê nav axê
Şiyar bibe
Deyl li dora xwe bike
Sterka azadiye geş bike
Ji bêdengîya te diranê min diarê

De bixwûn
Bixwûn heta zike we bibe bermîl
Bixwûn heta hûn bibaecin, heta hûn bifetisin
Hemû xwarinên xweş bixwûn
Bixwûn, jehrê bixwûn, ziqûmê bixwûn
Heta hûn dikarin bixwûn
Cîranên we berbê ji bîrçîbûna bimrê
Ji wer xem nîne
Hûn bixwûn
Dagirin wan kîsa
Wan telîsa
Wan çiwala
Heta hûn dikarin dagirin
Bidewsênin, bizepirênin
Heta çavên we têr bibin
Cîranê we berbê xîzan be
Hûn pera bidin hev
Heta hûn bi wan bicehemin

Hûn pirtûkên pîroz binpê dikin
Gotinên Xweda binpê dikin
Parezgehên dînî dihilweşînin
Natirsin ji Xwedê
Li ser navê Xwedê, mala Xwedê xeradikin
Û hûn dibejin em rizgarger in
Em bendeyên Xweda yên rastî ne
Em hevalbendê Xweda ne
Em li ser rêça Xweda ne
Xweda em ji bo ku we rizgar bikin şiyandiye
Li ser navê Xweda derûyan dikin
Nexape ha, nexape ti carî
Ew dijminên Xweda yên eşkere ne
Wan nas bike
Xwe biparezê ji wan mêjiyên qirej

Adar 2018, Êlîh

Dilazad A.R.T

dilazadart@gmail.com