Demsala Pirpirînkên Azadiyê

Bûm pirpirînk digerim li azadiya xwe
Ne şeva min wek şevê ye
Ne roja min wek rojê ye
Bi hêvî û xebatê digerim
Di nav tariyan de li ronahiyê
Ji reşayiyan ber bi ronahiyê ve
Mîna pirpirînkekê difirim ber bi azadiyê ve
Dilazad im di demsalên hêvîşikestî de
Hêviyan avadikim yek bi yek
Ji têkçûyinan ber bi serfiraziyan ve
Êdî alaya serkeftinê dihejînim
Li ser asîmanên bilind
Alaya azadiyê diçikînim
Li ser çiyayê herî bilind
Û bayê azadiyê
Dil û can û laşê min yên birindar dermandike

Ez azad im êdî
Ez dilazad im
Ji nû ve bi tahm dibe her tişt li min
Evîn
Azadî
Bazdan
Razan
Xwarin, vexwarin
Ken û girî
Şev û roj
Sterk, çem, av, gul
Û pirpirînk

Dilazad A.R.T

Dilazad ART

DILAZAD A.R.T (Jiyan û Berhem) Li ser çand û hûner û weje û sînemayê dixebitê. Nivîs û helbest û lêkolînen nivîskar di kovar û malperên Kurdî û Tirki de hatine weşandin. Bi zimanê zikmakî re (Kurdî) zimanê Tirkî û hinekî Îngilîzî jî dizanê. Nivîs û lêkolîn û helbestên Dilazad A.R.T di kovarên Nûbihar, Çirûsk, Nûpelda, Pengav, Heftreng, Keskesor, Nûdem (Qamişlo), Folklora Kurdan, Çandname, Bernamegeh, Sînemaya Serbixwe, Temaşe, Zaningeh, Bûyer (Qamişlo), The Hall Kurdî, The Raising of Kurds, Utopya, Artos, Tigrîs, Ufuk Penceresi, Ortak Zemin, Dava, Gizli Azizler, Rengîn, Besni Ekspres, OkuYorum, YazıYorum, DüşünYorum, Kalemyâr, Ramazan 2022, Ramazan 2024 û TigrisSophia de hatine weşandin. Xebatên Dilazad A.R.T di malperên wek zaningeh.net, nucehaber.com, newroz.com, nubihar.com, thehallkurdi.com, theraisingofkurds.com, candname.com, niviskar.org, zehraportal.com, hurbakis.net, antoloji.com, edebiyatdefteri.com, de hatine (an têne) weşandin. Di bin siya Zanîngeh Akademi de xebatên dokumenterî, klîp û fîlman amade dike. Berpirsyarê Giştî ê Zanîngeh Akademî ye.