Hêmin be dilê min
Me herdûyan semt şaş kir
Tu korî
Min jî bawerî bi te kir.
…
Herdû bi xemgînî li hev dinêrin
Heyva payîzê
Û zarokekî bê malbat.
…
Kalemêrê ku milêbê li ser bênderê hildide
Xewnên me jî pêre radike.
…
Çavê te li jina ku di bin baranê de dimeşe
Û çavên min jî li baranê.
…
Ez rabirdû di derî re derdixim
Di pencerê re vedigere.
…
Di riya berve te de
Bi awirên te dilukumim.
…
Pêmpilîka ku vê carê
Ji ser lêvên te firiye
Ne peyv bûn
Ew ramûsan bû.
…
Şax digrî û dilorîne
Ger ku ji darê cuda kirin.
…
Perçeyê textî
Li kêlek argûn
Dilê xwe bi rojên daristanê dimîne.
…
Ew jî mîna wan diêşe
Toprîhana ku li ser gorekê datînin.
…
Her ku darek ket
jina êzingvan
digrî.
…
Her ku yek ji malbatê ket
Dara tenha di hewşa malê de
digrî.
…
Pirên di navbera me de
Li pey hev ketin
Ji ber ku me
Bi pûş û qamûşê ava kiribûn.
…
Li mala xwe bi tenha serê xwe ye
Li pêşiya sobê
Pîrejin roja evînê a yekemîn bibîr tîne.
…
Pştî salan di ser cengê re
Her ku zivistan hat
Li ber amûra xwe ya kevin rûdine
Û kurtikekî ji zarokê xwe yê mirî re didrû.
…
Gava ku te bi paşila paltoyê min girtiye
Û te bi hêz ber xwe kişandime
Êş ji destê min ket
Û li ser masê şikest.
…
Ez ê embara te bi peyvan dagrim
Ew jî weke zêr
Diçrûsin.
ــــــــــــــــــــــــــــــــ
Helbestvan: Abderrahim El Khassar.
Wergerandin ji zimanê erebî Majêd a Mihemed