Ey saqî, ji kiteba noqteyek im
Ji deryaya dilopek im
Ji qedehê qurtek im
Ji can û bedenê ve pifek im
Ey saqî, ev çend sal in digerim li dost û hevalekî
Min nedît û nasnekir yekî weke te dilpakî
Dinya xayîne, ne bû yar, her bûye bar
Her ku me jê bawer kir ew bû arekî dijwar
Ey saqî, ez muptelayê meyxanê me
Heyranê şeraba ji destê te me
Were saqî, bixwene ji kiteba eşqê
Ji bo dilê min û yarê bikin meşke
Ey saqî, were derman bike van birîn û derdan
Dilê me wek cama Cem cîla ke bi soravan
Serxweş û talan im li meyxanê xêrîdar im
Tu were bazarê ê can didê bi erzanî ez im
Dema me tîra xwe avêt sedefa yarê
Can û beden bû wek pêt û arê
Kevankêş ser xwe rakir perda şermê
Bi şeraba eşqê gihaşte wê sir ê
Ava ku naherikê dibê genî,
Bedena nagerê dibê laşek mirî
Du dil û mejî, du can û beden,
Ku nebê yek ha sax ha mirî
Min dixwest ji bo te helbestekê binivîsînim
Lê dema min navê te digot her tişt ji bîra min diçû
Min dixwest ji bo te gotinên xweş bibejim
Lê navê te ji tev xweşîyan xweştir bû li ber dilê min
Tev gul û kulilk ji bo te bin
Ronîya roj û heyvê li ser te bin
Ava çem û zozana li ber pîye te bin
Dilazad im dildar û evîndarê te me
Ey şahê çavbirçî, çav bernede xezalê ew ya min e
Gerden ji zêr û zîv, zimrûd û yaqût e, ji bo çavê min e
Sîng tev çem û kanî, newal û zozan e, ji bo dilê min e
Lêv şekir û hingiv, şerab û şîr e, ji bo lêvê min e.
Ey kesê li ber dergeyê mîran, li ber te av û emê te
Kurtan ji te kêm e, biqasî kerekî nîne qîmetê te
Li qesrê li pey quna mîr digerê mîna koleya
Dema mîr hestûyan nîşan didê ewt ewta te ye.
Ey Dilo, te xwe gelekî êşand bi kul û derdê xelkê, bes e
Ji derba van nezan û sofî û melayan por spî bû, bes e
Ji bo aramî û dilşabûnê tasek ji şeraba saqî ji bo te bes e
Dilê te wek kanî ber biherikê, dema dil safî û zelal bû, bes e
15.04.2022 Corduene
Dilazad A.R.T.
Gotara berê: Dil bû Beyto ji rih re Can: Gelo tu çima şiyar nabî?
Gotara piştî: Di hînbûna zimanî da çi qas zehmetî heye?
Gotarên Têkildar
Nasname û Ziman – Mela Huseyn Êsî
