Çarşamba , Ocak 20 2021

Sala nû (2021) li min û we pîroz be!

“Sal bi sal xwezî bi par

Belê ezbenî, di serê vê sala nû de, ji pirbûna pirsan tu xwe di nav bersivan de winda dike, zimanê te li hev diherbile û tu nema zane çi bêje û çi nebêje.. Tu dixwaze derewekê bike û ji derewa xwe bawer bike.. An hin derewekê bikin û te ji wan bawer bike û xwe bi derewa wan razî bike..!

Ezbenî! Kelehên bilind zû bi zû naherfin.. Deryayên şîn tu carî naşewitin.. Dergehê gulîstanên ku asoyê wan bi nêrgiz, çîçek, gul û kulîlkan xemilandîne, bi qirşûqalan nayên nayên veşartin.. Na na.. ji derewan bawer neke û bi şerîta wêne û bîranînên xwe re bixeyde û bibêje; êdî bese.. rawest e..

Ezbenî! Dinya civat e û civat, civata me ye. Pêwîste ku tu gulek be ji dara vê civatê.. Tu gulek geş be, gulek bi hilm û bîn û rengîn be.. Mane sal derbas dibin, roj derbas dibin û tiştekî veşartî di bin kurkê xwe de nahêle û dawî, ma tu nizane ku wê roj biaxifin..

Ezbenî! Di derbasbûna salan û guhertinên demsalan de, bîranîn têne tevdan.. Şerîta wêneyan li demê siwar dibe û bi pêş û paş ve vedigere; hin dêm, bûyer û demsal bi te re dikenin û digirîn û bi xurtî xwe tînin hizir û bîra te.. Hin caran jî çendî tu li wan bigere winda dibin, tu wan nabîne.. Dêmê hina jî, ji ber çavên te winda nabin, li pêş te sekinî dimînin.. Tu li ser hina digirî û gazinda dike; Çima zû barkirin..?! Di nav re jî, tu dixwazî dêmê hina, bi yek carî ji bîranînên xwe bavêje û bibêje; Ofyan ez ji wan xelas bûm, bibûn bela serê me..

Ezbenî! Di guhertina salê de, di serê sala nû de, tu rojên xwe yên derbasbûyî li serad, moxil û bêjingê dixîne, dêmê hina ji wan kesên ku li ber dilê te şêrîn û nazik bûn têne bîra te.. pêre pêre jî hin dostên te yên qelip têne bîra te.. yên ku te qencî bi wan kiriye û tu ji xwe re dibêje; Çima wilo kirin… Gelo rast e qencî dibe xerabî?!! Mane Mîr Celadet Bedirxan gotiye: “Dinya guleke, bîn bike û bide hevalê xwe”.

Ezbenî! Berî ku hestê netewî ligel min hev bigire, min zaroktiya xwe di nav kêf û şahiya nezanî û cehaletê de derbas dikir.. Piştî ku mezin û serwextî derdora xwe bûm û min naskir ku ez kurd im û welatê min Kurdistan e, hin bi hin xemgîniyê dest pê kir.. Ew xemgîniya ku rêjîmê bi plan konê wê di ser welat û welatiyên min re vedigirtibû.. Erê ezbenî çîrok dirêj e û tevî ku bav û kalên me ji mêj ve gotine: “Sal bi sal xwezî bi par“.. Sala nû 2021 li min û we pîroz be.

 

Konê Reş, 29.12.2020

 

About Konê Reş

Konê Reş

Check Also

TERCÎHA NIVÎSKAR

Bi sedan cure xwendevan hene. Her xwendevan li gor xwe xwedî taybetiyên curbecur in. Xwendevan …

Bir cevap yazın

E-posta hesabınız yayımlanmayacak. Gerekli alanlar * ile işaretlenmişlerdir