Şemî , 28 Sermawêz 2020

Serrnewe Pîroz Bo – Roşan Lezgîn

No serê sibayo rindek yê na roja bimbareke de, roja verêna yew serra ma ya newîye de ez hewn ra werişta, mi perdeyê xwu da kîşte, teber ra her ca sipî keno. Cor de vewre wedi-werdi sey rehmetî yena war. Mi temaşe kerd, sîneyê mi mufereh bi, boya mi abîye…

Seba ke welatê mi, dew û şaristanê mi bi destê zaliman yenê wêrankerdiş, miletê mi binê zulmî de naleno, ez tim mehzun bîya, hema vajên mi keyf û weşîye kerdê xwu vîr ra…

Ya Homayê mi, ez nika verê xwu dana to.

Ti pîlê pîlan ê, quwet û qudretê to heme çî ser a yo, ti heme çî ser o hukim kenê, ti eşkenê çinbîyayîş ra çîyan biyarê meydan û ti eşkenê her çîyo ke esto helak bikerê…

Ez bi zerrîyêka pake, bi xulqêko safî to ra rica û minete kena, ti welatê mi binê hukmê zaliman ra azad bikerê, ti miletê mi binê destê zaliman ra vejê û serê erdê xwu de muqtedîr bikerê, bikerê wayîra dewleta xwu. Ti dişmenanê miletê mi zî îsleh bikerê, zulmê înan bidê vindarnayîş. Sulh û aştî û edalet û huzur û weşî biyarê welatê mi. Dima biyarê heme welatanê cîhanî…

Ti fam û feraset û qabilîyet bidê miletê mi, aqubetê miletê mi baş bikerê, başîye ser îtîfaqê miletê mi daîmî bikerê.

Ya Homayê mi, mietê mi ra ferdê ke kewtê dama dişmenan, nimitkî yan eşkera hesabê dişmenî ser o eleyhê miletê xwu de xebitîyenê, eşkera yan nimitikî xizmetê zulmî kenê, xizmetê dişmenanê miletê mi kenê, ti înan îsleh bikerê, rayîro raşt bimojnê înan û ti kerdenanê înanê xiraban rê bibê manî.

Ya Homayê mi,
Ti eqrebayanê mi, heval û hogiranê mi, der û cîrananê mi, nas û dostanê mi, heskerdoxanê mi rê zî selametîye, weşî û başîye bidê. Dima selametî û weşî û başîye bidê min û keye û kulfetê mi zî, ti tengî û tehlîye nîşanê ma nêdê…

Ya Homayê mi,
Na vewra sipîye ke cor ra sey rehmetî yena war, her ca kerdo sipî, heme çîyê xirabî binê xwu de nimitê, nê hîsê rindekî ardî mi vîr, înşalah ti zî tim rindek biewnîyê ma ra, nê duayanê ma dergayê xwu yê alî de qebul bikerê înşalah…

Roşan Lezgîn 

About Rêvebirê Çandnameyê

Rêvebirê Çandnameyê

Check Also

Çavxezal a Qahir Bateiyî

Payîz e. Mijdar e. Li hawîrdorê min pelên zer hene. Payîzê, nîşanê xwe li her …

Bersivekê Binivîsêne

Epeyama we nayê weşandin. Qadên pêwist bi * hatine nîşandan.