Astrolojîya Kurdan – Zewijîyayîş yan Nêzewijîyayîş

Erd û asmên zaneno ke qederê kurdan pê layêkê sîyayî ameyo bestiş. Kurdê rebenî emrê xo de rojêk pê çîyêk şa nêbîyê. Ho- mayê rojhilat û rojawayî ne parçeyêk erd û ne zî qefleyêk varan kerdo nasibê kurdan. La hêvîya xo kêm mekerîn.

Seba ke qeder û cuya kurdan resm bik- erî; embaza ma M.D. rew ra ewnîyena falê kurdan. La ma rîca û dexalet kenê ke şima aye sey falbazêk mehesibnê. Çike M.D. ne pê peran nê karî kena ne zî wazena xo bido wasifnayîş. A tena wazena ke çi dî çi mu- saye bimojna şima. Ez Şadê Agon nuştoxa nê nuşteyî ya nika qalem û klavyeyê xo dana destê M.D. Bimanê weşîye de wendoxê delalî.

“Ma bi xêr dî. Seke şima zî zanenê nameyê mi M.D. ya. Mi nêwaşt nameyê xo eşkera bika coka mi nuştoxe ra zî destûr girewt ke şima mi tena pê herfan nas bikê. Bîyo di hîrê serrî ke ez ewnîyena der û dor, nat û wet û vizêr û ewroyê kurdan ra. Eşkena vaja ke ez xo serkewte hesibnena. Sirê mi no yo ke têkilîya mi û merdimê ke yenê cayê mi zaf baş o. Yanî mesele o yo ke ganî merdim ê bînan de pê biko. Mi nê serran de zaf çiyî musayî. Heta ma vajîme yew sîyasetdaro pîl yê kurdan zî qasê mi şarê ma mi ra holêr nêşinasneno. Ez bira û wayanê xo rê vaja şarê ma yo ke yenê cayê mi tewr zaf meraqê zewajî kenê. Hela ewil ez pê ney şaş menda Homa wekîl! La senî şaş nêba nê merdimî pêro ke mîyanê înan de mamostayî, hûnermendî, dewlemendî û xora wendekarê feqirî zî estê ke -ê zaf muhîm nîyê- serranê xo de pîl ê û debarê xo hol o. Mi reya ewil xo bi xo va yeqîna nê pê mi yarî kenê. La barcî pê hesîya ke raşt a zî derd û kûlê înan zewaj o. Ez ke merdimêka wendaye yan zî zanaye nîya. La mevajîn ez hera hewt dewan a zî. Xebera mi sîyaset û rojaneyê dinya ra esta. Seke şima zî zanenê mîyanê kurdan de yew qiseyê femîmîzm, pro-femînîzm, bîreyselleşme û nizam çi çi bîyo sey nîşana merdimbîyayîşî. Yanî nê çiyî pêro hetê mi de yenê maneyêk yan zî fermanêk; mezewijîn. Mi sey îmanê xo zanayêne ke şarê ma yo zanaye tim şinê semîneranê nuştoxanê ke înan ra teber yew qulê homayî kitabê înan nêwendê, feyz genê fotografanê xo vejenê aye yê ke cinî yê eteganê etnîkan kenê xo pay yê ke camêrd ê fularanê moran bestenê xo ra ke seke pro- femînîst berê hesibnayîş. La şima nêvatêne ke binê nê etegan û fularan de yew camêrdo ke wazeno cinîya xo wa nêxebite keyeyî de hîşarê gedeyan bibe yew cinîye ke wazena serranê xo ya vîst û heştanî ra ver qayîla ke bizewija esta. Ez zî guranê xo zanena, key ez nê çîyan hesîyaya mi ca qiseyê xo yê ke mi heta nika kanalanê kurdan ra museya bedilnayî. Nika kam bêro cayê mi ez her çî ra ver sey temînatêk ci rê vana ke ez zanena ti qayîl ê bizewijîyî la ti şermayenî ke herkes nê çî bizano. Meraq meke qalê mi to qalî mîyanî.

Fertarî ez înan ra hêrs zî bena. Ê heyran coka ti wazenî bizewijî wa kam çi vano wa vajo. Bî di serrî ke nê hedîseyî pêro bîyî.

Hînî nêeşkena biewna falê şarê ma ra. Yew birazeya min a vîya esta. To ra dûrî bo sey to genc a. Nika ez ha dersanê falî dana aye. Mesela şeklê maseyî yan zî şeklê koyî yeno çi mane mûsnena ci. Xora musayîşê maneyê şeklan zor nîyo, her zî eşkeno bimuso. Karo o zor zî rast a o yo ke ganî merdim derd û royê şarê xo fular û eteganî ra ney awiranê înan ra fam biko! Axir ez nêeşkeya safî bika beno ke birazeya mi pê bieşka. Homa pîl o.”

Şadê AGON – • PopKurd, Jimar 2 • 2018 Îlon