Çîroka Mar û Rêwî

Rêvebir 10/08/2021 Çand, Wêjegeh Şirove Bike

Rojekê rêwiyek (rêvingiyek) rê de diçû. Dengek hatê. Li ser milê xwe zivirî, dît ku li kêleka rê kevirek wergeriyaye ser
marekî m…ezin. Mar dike nake, nikare ji bin kevir derkeve. Dilê mêrik gelekî bi mar şewitî, xwe xwar kir û bi herdu destan kevir ji ser mar wergerand û mar rizgar kir.

Dema ku mar rizgar bû, di şûna ku sipasî rêwî bike wî xwe li aland û devê xwe bir binê stuyê rêwî guhê wî û gotê:

– Ez dê bi te vedim! Rêwî veciniqî û got:

– Ma tu yê çawa bi min vedî?
Min a niha te ji mirinê rizgar kir! Mar got:
– Zêde gotinan neke. Te çi kiribe ne xema min e! Madem tu mirov î, tu dijminê min î, ez ê bi te vedim!

Û devê xwe vekir û xwe pirtir nêzîkî bin çenga rêwî kir.

Rêwî fêhm kir ku axaftina ligel mar bê kêr e, îcar got:
– Were em ji hinekan bipirsin ger gotin tu mafdarî wê demê bi min vede, tu serbest î.
Mar got:
– Baş e were em ji darhêjîrê bipirsin. Rêwî û mar çûn ba darhêjîrê û çîroka xwe jê re vegêran (vegotin). Piştî ku darhêjîrê guhdarîya çîroka wan kir, ji mar re got:

– Tu min dibînî? Ez havînê li ser mirovan
dikim sî, hêjîrên şîrîn didim wan, digel ku payizê pelên min diweşin, dîsa jî ew bi das û biviran bi min dikevin, ta û şaxên min dibirin û dibin malê dişewitînin. A mirov ew kes in ku dijminê hemû jiyandaran e. Zû pê vede berî hîn ku te nexapandiye.

Rêwî hema yekser ji mar re got:
– Ka raweste, raweste! Em ji yekî din jî bipirsin!
Rêwî hîn axaftina xwe temam nekiribû ji wî alî de kerek ziriya.
– Baş e em dê pirsa xwe ji kerê jî bikin.
Rêwî û mar çûn cem kerê û rêwî destpêkir çîroka xwe ji serî heta binî jê re got. Ker careka din ziriya û got:

– Ax û axx! Hûn min dibînin, min hemû ciwanî û zilamtiya xwe gorî (bi qurbana) mirovan kir. Pişta min ji ber barê wan xûz û xwar bûye. Roj tuneye ku min ew û barên wan li pişta xwe nekiribe. Lê çawa ku ez piçekî pîr û lawaz (jar) bûm,
wan ez berdam çolê. Xwedê zane ya îro yan sibê ez dê rastî revdeyeke guran bêm û ew dê min parçe parçe bikin. A mirov
ev in ha! Jiyandareke zordar û bê wefa ne. Ez bi gorî wan diranên te yên tûj û jehrdar bim, hema nesekine, pê vede!

Di wê gavê de roviyekî silav da û hat ba wan.
Rêwi hema yekser ji mar re got:

– Ka raweste, em çîroka xwe ji rovî re jî bibêjin hela ew çi dibêje! Ger wî jî wisa bêje, wê demê bi min vede!

Rêwî ji serî heta binî çîroka xwe ji rovî re got û bû gulpe gulpa dilê wî hela ka dê rovî çi bibêje.

Rovî piştî ku guhdariya çîroka wan kir, got:
– Ka rawestin! Divê ku em herin wî ciyê ku te mar lê dîtiye, divê ku ez wî kevirî bibînim!

Ji kerba ligel hev çûn wî cihî, rêwî ew kevirê ku mar di bin de bû nîşanî rovî da. Rovî ji mar re got:

– Ka were xwarê, xwe li wî ciyê ku tu lê bû dirêj ke ez binêrim!
Mar xwe ji rêwî vekir, hat xwarê û çû wî cihî û xwe dirêj kir.

Rovî ji rêwî re got:
– Ka wî kevirî wekî berê deyne ser pişta mar da ku ez bibînim çawa bû!

Rêwî kevir hilda û danî ser pişta mar. Mar
jî wekî berê di binê kevir de asê ma. Rovî ji rêwî re got:

– De niha bi rêya xwe de here! Û zivirî ser mar û got:
– Tu jî di bin wî kevirî de bimîne!
Wexta ku mar dît ku rovî û rêwî dane rê, bû hawar hawara wî û got:

– Ka rawestin, bisekinin! Ma hûn dê bi ku ve biçin? Werin em pirsa xwe ji yekî din jî bikin!

Digel van gotinan, qijikeke reş li ber serê mar venişt û gotê:
– Dev ji wan berde bila ew bi rêya xwe de biçin. Vaye ez li vir im, ez amade me di bin emr û fermana te de me!

AMADEKIRIN: MUAYED TEYIB

ÇandName Li pey şopa bav û kalan…

Çîroka Mar û Rêwî

Like this:

Derbar Rêvebir

Nivîsên tekildar

Check Also

Rêzimana Dîwana Melayê Cizîrî

Leave a ReplyCancel reply

Çîroka Mar û Rêwî

Bunu paylaş:

Like this:

Derbar Rêvebir

Nivîsên tekildar

Gotinên Tiryakî- Cenap Şehabettîn

Sê Qewmandinên Ecêb Ji Jîyana Ronakbîrên Me

Folklor û Helbesta Modern

Check Also

Rêzimana Dîwana Melayê Cizîrî

Leave a ReplyCancel reply