Roşan Lezgînî ra yewna xebate: Ferhengê Zazakî – Tirkî & Tirkî – Zazakî

Nuştox, cigêrayox û wayîrê Weşanxaneyê Roşna, Roşan Lezgînî ziwanê ma de yewna xebata xo temam kerda.

Xebata Roşan Lezgînî “Ferhengê Zazakî – Tirkî & Tirkî – Zazakî” 504 rîpelî yo.

Lezgînî da pêhesnayîş ke, na xebata ey semedê înanê ke wazenê Zazakî binusnê eynî wext de rêberê raştnuştişê kelîmeyan o û hewteyê vernîya ma de vejîyo.

Lezgînî hesabê xo yê Xî ser ra derheqê kitabe xo yê neweyî de nê çîyî vatî;

“Dosyaya Ferhengê Zazakî – Tirkî & Tirkî – Zazakî ke yew demo derg ra ez ser o xebetîyena ewro şî metbea, înşelah do eno hewteyê vernîya ma de vejîyo. Ferheng ebadê 13.5 x 21 cm de 504 rîpelî yo.

Mi eno ferheng semedê yew îhtîyaco raşt û pratîk yê wendoxan û nuştoxanê Zazakî amade kerd, coka tenya kokê kelîmeyan esas girewt, kelîmeyî nêviraştî û ca nêda fiîlanê terkîbî û tehbîrkî zî.

Qismê Zazakî – Tirkî de 13.664 madeyî, qismê Tirkî – Zazakî de 12.419 madeyî estê. Mi zafê kelîmeyanê Zazakî gelek eserê ke bi Zazakî nusîyayê ra arêdayî û formê ziwanê nuştekî de nuştî. Ferheng ,semedê înanê ke wazenê Zazakî binusnê eynî wext de rêberê raştnuştişê kelîmeyan o.

Xebata min a amadekerdişê ferhengê tenya bi Zazakî îzehkerdişê mehnaya kelîmeyan zî dewam kena. Homa hes bikero, o zî do rojêk amade bibo.”

zazakinews.com