ÇandName Li pey şopa bav û kalan…
Serkeftina Amedsporê ne tenê encameke werzişî ye; ew vejîna moralekî, geşbûna hêviyekê û nexşandina nasnameyê ye li ser rûyê dîrokê.
Duh berêvarê, gava tîna rojê li ser kelehên Amedê hêdî hêdî hênik dibû, li her çar aliyên welat kelecaneke bêdeng lê xurt hebû. Her kesî li benda mizgîniyekê bûn ku bi salan e di dilê wan de mîna kopekî agirê geş dima. Maça li hemberî Îdirsporê bi encama 3-3 bi dawî bû, lê bi nûçeya şampiyoniyê re Amed bû deryaya kesk û sor. Ev “hatina” dîrokî ya bo Lîga Super, bû sembola serkeftina vîna mîlyonan.
Werziş Wekî Zimanê Çandê
Amedspor ji bo me tu carî ne tenê tîmeke futbolê bû. Ew, zimanê çandekê bû ku li ser qadên kesk xwe îfade dikir. Slogana “Em tên” ya ku di nava mîlyonan de deng veda, duh bû “Em hatin!”. Ev hatin, ne tenê derketina lîgekê ye; ev îradeya hebûnê ye ku di her gola xwe de çîrokekê vedibêje. Gava gel li kolanên Amed, Wan, Mêrdîn û heta bajarên Ewropayê bi coşeke mezin vê serkeftinê pîroz dike, em dibînin ku Amedspor bûye pireke çandî di navbera dilê kurdan de.
Kelecana Ku Sînoran Nas Nake
Yek ji taybetmendiyên herî bedew ên vê serkeftinê, yekbûna ruhê mîlyonan e. Gava li qadê top li torê diket, li Mehabadê qêrîna şahiyê bilind dibû, li Qamişlo rûyên mirovan diket. Amedsporê bi vî rengî nîşan da ku werziş dikare sînorên li ser nexşeyan bibe û bibe zimanê hevpar ê yekîtiyê. Ev şampiyonî, diyarî gelê kurd hat kirin ku her tim bi sebir û bawerî li benda vê rojê bû.
Bîranîna Kaptan Şêxmûs û Dengê Denîz Nakî
Di vê serkeftinê de keda her kesî heye, lê me wefaya xwe ji bîr nekiriye. Ev şampiyonî berî her tiştî silavek e ji bo Kaptanê nemir Şêxmûs Özer; ew kaptanê ku bi ruhê xwe yê têkoşer rê nîşanî me da. Di heman demê de em her tim bi hurmet Denîz Nakî bi bîr tînin, ku di rojên herî dijwar de bi helwesta xwe ya çandî û nasnameyî bû dengê rûmeta Amedsporê. Ked û fedakariya wan, bingeha vê destana îro ye.
Destpêka Rêyeke Nû
Êdî Amedspor bi nav û nasnameya xwe ya resen, li qadên herî bilind e. Ev serkeftin ji bo ciwanên me yên hunermend, nivîskar û werzişvan dibe çavkaniya baweriyê. Em dizanin ku ev ne encam e, lê destpêka serdemeke nû ye ku tê de rengên me, dengê me û vîna me dê bêtir geş bibe.
Serkeftin li Amedê û li gelê me yê berxwedêr pîroz be!
Nivîskar: Şîyar Barman
