Holiya Ap Husî – Fiqra (Zazakî)

Mêrdeyê waya Ap Hesê Keyê Hesan Xala Xece rewna merdibi. Xala Xece, çend sêwirî mil de, viya mendibî. Bi zor, pê fitr û malê zekatî, pê sedeqe û xeyran idareyê xo kerdêne. Xala Xece aşma rojeyî de nêzdiyê roşanî pêhesîna ke do birayê aye Ap Hus șo Licê. Serê sibayî rew, a zî pey ra kewna Ap Husî dima, şina Licê. Çarşiya Licê de Ap Hus dikan bi dikan gêreno, keyeyê xo rê çi-mî herîneno.

Axir dikanê pirtî de Xala Xece Ap Husî qefelnena. Xala Xece xo rê seba pirênî çend metreyî qumaş bazar kena. Ap Hus mecbur maneno, heqê qumaşî dano. Nêzdiyê êreyêk her di piya Licê ra kewnê teber. Rayîr ra rastê çend ciniyan benê. Xala Xece û ê cinî biney pers-mersê yewbînan kenê. Her kes rayirê xo ra şino. Badê ke cinî şinê, Ap Hus fetelêno Xala Xece ra vano:

-Herê Xecê, ti çend nankor a! Qey to o qumaş nîşane ê ciniyan bidayne, to bivatêne birayê mi no pirên mi rê girewto, qiyamet weriştêne?

Fiqra: Roşan Lezgîn