Zeyno:Armanca min qeydkirina xwarinên Kurdistanê ye

Kengî û çawa te dest bi nivîsandinê û dest bi tomarkirina xwarinên kurdan kirîye li ser biloga xwe?

Ez mihendisa xwarinê me. Aniha li xwaringeheke taybet kar dikim. Ji mêj va bala min taybetî li ser xwarinan bû. Ji ber wê min li zankoyê beşa mihendîsîya xwarinan xwend. Rojekê bi hin hevalên bilogên wan ê kurdî hene ra rûnişti bûm. Me behsa biloggerîyê dikir. Ji min ra gotin çima tu jî dest pê nakî. Tu jî zanyarîyên xwe belav bikî. Min jî dest pê kir. Çîroka min û biloga min “Nanoziko” wisa dest pê kir.

Ez dixwazim vê bêjim; tiştên li ser vê axa delal; çi bê bîra we; însanên me, çanda me, zimanê me ez aşiqî hemûyan im. Ji bo wê ez bi kurdî behsa xwarinên me dikim.