Me alaya mirovahiye bilind kir
Tu nehêle ku dakevê, ey Xweda
Me kelha dadê ava kir
Tu nehêle ku hilweşê, ey Xweda
Me ji dîn û zanîne şûr û mertal çêkirin
Tu şûrên me tûj, mertalên me bihêz bike, ey Xweda
Ev xak, bi namus û rûmetê hatiye avdan
Tu bêrûmet neke, ey Xweda
Ev welat nîşana fermana Te ye
Tu bêferman nehêle, ey Xweda
Ev azadiya ku Te daye me
Da tu kes ji destê me dernexê, ey Xweda
Ev av û çem, ev çiya û zozan
Tu bê mirov nehêle, ey Xweda
Tu biparêze ey Xweda, vê jiyana azad
Ji destê dagirker, mêtînger û sîtembaran
Vê sirûşta ku tenê ji te re secde dike
Tu paqij bihêle, ey Xweda
Ji van bendeyên ku tenê ji Te re serî ditewenê re
Tu temenekî biadan bide, ey Xweda
Ey Xweda, ev xaka Kurdistan e
Warê mazlum û şehîdan e
Li ser rûye cihanê tenê kurd bê dewlet mane
Tu dewleteke serbixwe diyar bike, ey Xweda
Ev ax şûnwarê peyxemberan e, ev mirov neviyên
Selahaddîn in
Tu Qudsê nû bi destên wan azad bike, ey Xweda
Her kurdek amadeye ji bo bilindkirina alaya Te
Tu ji alaya kurdan bilind bike, ey Xweda
Ev erd, maka Cudî, Dîjle û Firat e
Ev erd kaniya kurd, siryan, ermen, ereb û farisan e
Ji vê xaka dîrokî zaye, zanist û şaristanî
Tu ji çavnebaran, ji çavbirçiyan biparêze, ey Xweda
Ev can, ev dil, ev hiş wek kaniya zelal û pak in
Tu her dem serfîraz bike, ey Xweda
Ne tirk û ereb û faris im
Ne jî dizanim farisî û erebî û tirkî
Kurdekî serbilid û mêrxas im
Zimanê min kurdiye, ayetek ji ayetên Te ye, ey Xweda
Dilazad im, dixwazim jiyanek azad û bextewar
Tu me bê azadî nehêle, ey Xweda
DILAZAD A.R.T
dilazadart@gmail.com
Gotara berê: Kilamên dengbêjan hêjî li deşta Mûşê deng vedidin
Gotara piştî: Li ber keviya ‘Heyat’ ê…
Gotarên Têkildar
Ji Kaniya Gel Çend Xebatên Folklorî
