Dîk û Rovî

 

Wek qijo, dîk jî carek
Rabû ser şaxê darek

Ji rewşê dibû diyar
Ne ferx e ew extiyar

Bang didan bi kubarî
Ka qirikê çi karî

Rovî çawa dengê dîk
Seh kir xwe gihand nêzîk

Dilşad û bi lezgînî
Got: Birako mizgînî

Li hev hatin ajal tev
Êdî ne hewce ye rev

Ez sûnd dixwim bi îman
Xirab nabe ev peyman

Destbira ne vêca em
Ne derd hene ne jî xem

Tu bi Xwedê ji darê
Bêje “pirt” were xwarê

Ez te maçî kim hinek
Rast dibêjim ne henek

Divê ez vê xeberê
Bigehînim her derê

Pir ku heye karê min
Sivik bike barê min

Her digerin hûn betal
Lew karan nakin mital

Ha! Îşev qet nîn e xew
Şeng şahî ye êdî hew

Dê em jî bin alîkar
Çimkî hat li me bihar

Ez di bextê te were
Aşîtî ye ne şer e

Ji nêz ve bikin pîroz
Çi şirîn î dîkê boz

Dîkî gotê: Birê min
Wey tu taca serê min

Hingî evê gotinê
Şad nebûme li dinê

Nexwasim ku ji we tê
Mizgîniya cinetê

Pir mame heyret û mat
Şahiya min bû du qat

Yeqîn bo vê xeberê
Wa du tajî tên li rê

Ew jî bi ecele ne
Çi xweş jî tên maxane

Madem wisa ne ew çax
Va xwe davêjim ji şax

Em tev bêne serê hev
Pîroz bikin ta bi şev

Rovî çawa lê meyzî
Ji ser ta pê tevizî

Got: Bira xatirê te
Paşî dê bêm serê te

Ji ber vî karê bilez
Pêwîst e bibezim ez

Ji tirsa rih û canî
Rovî ling lingan danî

Ew diçû tajî li pey
Te digot bager e qey

Heta vexwî qurtek av
Winda bûn ew li ber çav

Li pêş her sêyan ve dîk
Dikenî bi hîkehîk.

08.04.2019
La Fontaîne
Lêanîn: Memê Miksî