Behsê Dua – Mela Mehmedê Nêribî

Behsê Dua – Mela Mehmedê Nêribî

ʿEmrê ma şîyw ya Rebî ma mirenî
Ma ko bar kî ma ha ver bi to yenî

Mergê ma nuzdî w’ ha nîw’ pey goşê ma
Her gûmi înko benû ki bimrî ma

ʿEmro fanî pîrû şîyw sey laserî
Ma bîy şaşû, ma nîşay war bî de rî

ʿEmr û xortey pîrû şîy pey ẍefletî
Mehkumî ma y’, defterî ha to hetî

Ko tepîşî mehkumow’ ma bîyarî to
Çi ʿezab û ʿefû pîrû karê to

Ma çinî bî ya Rebî, yew çilki bî
Xelqê ma kerd to bi rehmay xwu Rebî

Pîrû zonî ino hukmê Xaliqî
Ha çi rind û ha çi pîs û mexluqî

Ẍafilî w’ înkar û, ma bêşikretî
Tim bêhêş û, ʿaqilê ma seqet î

Ger bibû ʿaqil û hêş ma di temam
Ma gerek taʿet bikerdê subh û şam

Ya Rebî, ma zav nezon û cahil î
Sew ti ma ʿafû kî ma zav qaîl î

Şefqetê to zav û tim sey hêrsê to
Rehmet û şefqet û ʿaf û îrsê to

Ya Rebî ma tim feqîr û bêkes î
Hîvîyay ma; rehmetê to ma resî

Wazenî ma ya Rebî tim lutfê to
Her zemo[n] ma ser û tim hukmê to

Hukmê to sist nêbenû hetta heta
Ger çiqa ma ẍafil î w’ warê xeta

ʿEbdê to y’ ma hem kemî w’ hem qasir î
Halê ma pîrû ti zonî, nazir î

Çew çînî w’ halê xwu vacî de rî
Ẍeyrê berdê rehmetê to Qadirî

Bêkes û ma bêheval û wehşet î
Ti enîs û hem heval î, ma hetî

Çew çinî w’ ma bêumîd, bêtaqet î
Warê ma tî y’, ma bê to “la teqnet” î

Ya Rebî, ma warê fîʿl û zilet î
Ti Kerîm û hem ʿEzîz û ʿîzet î

Xelqê ma bîyw qay sebay ʿîbadet î
Ma esîrê nefs û dunya w’ lezet î

Guney û ʿeyb û qusurî ma hetî
Rehmet û meẍfîretî ha to hetî

Îhtiyacê ma bi rizq û sihetî
Ti Rezaq û hem Hekîmê ummetî

Ma ko vacî “Rebbî, ma hîvî kenî
Ti ʿefû ki ma enîno , ma nalenî”

Ya Rebî, ma hem feqîr û bêkes î
Wazenî ma rehmetê to ma resî

Destê ma w’ destê çikus destê binî
Hirs û teʿma w’ ma girewtî, ma çin î

Ya Rebî ti warê rehm ew quwwet î
Ma feqîr û bêkes û bêtaqet î

Ma warê ʿeyb û qusur û zehmet î
Ti warê lutf û kerem û rehmet î

Ya îlahî, warê ʿeşq û şefqet î
Ma zelîl û bêkes û bêhîmmet î

Her çiqa ʿeyb û qusuro ma hetî
Ti setar û warê hîlm û rehmet î

Ma viraştî Xaliqî ardî vucûd
ʿAfû ki ma ya Rebî ya Ze’l-Wedûd

Ya îlahî, warê fedl û minnetî
Ti ʿefû ki, ma bî fexr û hîmmetî

ʿEybê ma sey qumdê roy û laser û
Hîvîyay ma, rehmetê to ko berû

Ger ti nêbî, ma se kenî ya Rehîm
Sew ti ruwenî ma ser û curmo ʿezîm

Ya Rebî ti b’ hurmetê nomey’ xwu ki
Ma gunekar û feqîro[n] ʿafû ki

Temmet

Transkripsîyon: Bîlal Zîlan

Kovara MA’Z ÊST hûmara 9. ra:*

* Na şîîre “Kovara Ma’z Êst, hûmare: 9, Çewlîg 2023, r.28-29” de neşr bîya.