Tenê guhdariya bêdengiye dikim
Lê di bêdengiye de çiqas qîr û hawaran dibihîzîm
Kes pê nizanê.
Behna bajarekî ji ber teqîna maye tê behvila min
Rê û şopên piyên min dinav li xwegerîneke gûmanwarî de ye
Dîsa jî di hembêza xwe de hêviyên ber bi serkeftinê dimeyenim.
Bi tev hebûna xwe, êş û xemgîniyan li paş xwe dihêlim û ber bi roniyê ve dimeşim
Dimeşim, tevna jiyanê dihûnenim ji bermayînên bêjingê
Di tenûra serfîrazîyê de dipejin armancên min
Bi destên qirêj tene hilweşandin ew şûnwarên bi deste terikî avakirî,
Ez ji bo avakirinê, ji bo armancan dimeşim, diçim.
Di awirvedanê rojeke nixûmandî de
Ber bi behna bihareke derengmayîn de diçim
Tîrojên ku bedenen zingargirtî ji şewên şikestî rizgardike
Li ber kenê kulîlkên rûgeş
Dîlana çirçirken nûgihaştî
Temaşageha dile min ê azad ronî dike.
Ewqas dûr nemeyzêne
Di kurahiya dîtinên te de bajarên hilweşandî
Dîrokên talankirî
Mirovên li ber sêdarê dikenin hene.
Di reşahiya şeve de ew çavên te dibûn çira
Ez li ber şopa şewqa te digeriyam.
Ew awirên te ji ber çend fermanan filitîne
Wek tîreke serseri û bê armanç dinava dile min de kon vedaye
Tu çûyi lê behna te belavbûye li vî bajarî
Bê te tenetî wek baraneke şapeyî dibarê li ser sere min
Lehî serûbin dike xeyalên min
Bitenê, tî, birçî û behnteng im
Dema tu ji vî bajarî çûyî
Di şevbûherkên ji zivistanê mayî
Xewn û xeyalên Dilazad wek çîrokek nîvrê mayî
Li benda biharê me, li hêviya dawiya çîrokê me
Min nizanîbû bihar jî tu yî
Dawiya çîroka min jî tu yî
Batman, Tirmeh 2019
Dilazad A.R.T
dilazadart@gmail.com