Mizgînî! WordPress êdî %100 Bi Kurdîya Kurmancî ye

1

WordPress Çi ye û Çawa Serdestiya Înternetê Bi Dest Xist?

WordPress, sîstemeke rêveberiya naverokê (CMS) ya çavkanî-vekirî û belaş e ku dihêle her kes bêyî pêdiviya zanîna kodnivîsînê, malper, blog û platformên bazirganiya elektronîkî ava bike. Ev pergal li seranserê cîhanê ji aliyê civakeke mezin a dilxwazan ve tê pêşxistin û nûkirin. Îro li ser înternetê ji %40 zêdetir malper bi binesaziya WordPressê dixebitin. Ji ber ku belaş e, bikaranîna wê hêsan e û bi hezaran pêvek (plugin) û dîzaynên (theme) wê hene, bûye bijareya yekem a bikarhêner û saziyan.

Dîrokçe û Pêşketina WordPressê

Çîroka WordPressê di sala 2003yan de wekî projeyeke sade ya blog-nivîsînê dest pê kir, lê di nava du dehsalan de veguherî hêza herî mezin a weşangeriya dîjîtal:

2003 – Destpêk: Ji aliyê Matt Mullenweg û Mike Little ve li ser bingeha pergala kevin a bi navê b2/cafelog hate avakirin. Armanca sereke ew bû ku nivîsandina li ser înternetê ji bo her kesî hêsan bibe.
2004 – Şoreşa Pêvekan (Plugins): Taybetmendiya pêvekan li pergalê hate zêdekirin. Vê gavê rê da pêşdebiran ku taybetmendiyên nû li WordPressê zêde bikin û ew ji blogeke sade derxistin.
2010 – Ji Blogê Ber bi CMSya Tam ve: Bi zêdekirina “Custom Post Types” (Cureyên Naverokê yên Taybet), WordPress êdî ne tenê ji bo blogan, lê ji bo malperên nûçeyan, saziyan û portalan jî bû pergaleke temam.
2011 – E-Bazirganî (WooCommerce): Bi derketina pêveka WooCommerceê re, WordPress bû yek ji mezintirîn binesaziyên firotina serhêl li cîhanê.
2018 – Edîtorê Gutenberg: Sîstema nivîsandinê ya klasîk bi edîtorê nûjen ê li ser bingeha “blokan” (Gutenberg) hate guhertin. Vê yekê dîzaynkirina rûpelan gelekî hêsantir û dîtbarîtir kir.
Îro: WordPress ji bo weşangeriya nûjen, malperên pirzimanî û projeyên mezin ên dîjîtal bûye standardeke cîhanî.

Mizgîniya Mezin: WordPress êdî %100 bi Kurdî (Kurmancî) ye!

Ev pergala gerdûnî ya ku ji aliyê milyonan mirovan ve tê ecibandin, ji bo zimanê kurdî jî gihişt qonaxeke dîrokî. Bi xebat û kedeke mezin a wergêrên dilxwaz, wergera Kurdî (Kurmancî) di 16ê meha 11an a 2026an de gihişt rêjeya %100 û ji bo weşana fermî hate vekirin.

Ev pêşketin tê çi wateyê?

Sazkirina Yekser bi Kurdî: Êdî kesên ku bixwazin malpereke nû ava bikin, dikarin ji kêliya destpêkê ve panela rêveberiyê û hemû pergalê bi zimanê Kurdî (Kurmancî) saz bikin.
Veguherîna Malperên Kevin: Malperên ku berê hatine avakirin û di mîhengên xwe de koda zimanê Kurdîya Kurmacnî (kmr) hilbijartine, dikarin bi awayekî fermî û bêyî pêdiviya pelên derveyî, pergala xwe bi temamî bikin Kurmancî.
Standardbûna Dîjîtal: Termên teknîkî yên web û weşangeriyê di nava WordPressê de bi awayekî standart û hevgirtî cih girtin; ev yek jî ji bo pêşketina naveroka kurdî ya li ser înternetê gaveke gelekî girîng e.

Rola Çandnameyê di Vê Geşedana Dîrokî de

Gihiştina WordPressê bo rêjeya %100 ya zimanê Kurdî (Kurmancî), encama kedeke hevpar û demdirêj e; di vê serkeftinê de keda Koma Çandnameyê jî cihekî taybet û girîng digire. Çandname, ji roja avakirina xwe ve ji bo weşangeriya xwe ya dîjîtal binesaziya WordPressê bi kar tîne û ji ber vê yekê her tim di nava hewldana kurdîkirin û pêşxistina vê pergalê de bû.

Edîtor û pêşdebirên Çandnameyê, li gorî pêdiviyên weşangeriya modern, ne tenê pergal bi kurdî bi kar anîn, di heman demê de ji bo ku termên teknîkî yên webê bi awayekî rast û resen di kurmancî de rûnin, keda xwe xistin nav vê pêvajoyê. Di temamkirina wergera dawîn a pergalê de jî para edîtorên Çandnameyê gelekî mezin e; wan bi xebta xwe ya salan a di warê weşangeriya dîjîtal de, piştgiriyeke xurt da vê xebata gerdûnî da ku zimanê kurdî di qada teknolojiyê de bibe xwedî standarteke xurt.

Daxistin û Bikaranîna Fermî ya WordPressa Kurdî

Êdî ji bo avakirina malpereke bi zimanê Kurdî (Kurmancî), pêdivî bi tu dosyayên derveyî yan jî sererastkirinên destî nemaye. Hûn dikarin guhertoya herî nû û %100 wergerandî ya WordPressê rasterast ji malpera wê ya fermî daxin û di çend deqeyan de malpera xwe ya kurdî ava bikin. Ji bo daxistina pergalê û şopandina nûvekirinên zimanê kurmancî, serdana navnîşana fermî bikin:

Navnîşana Fermî ya Daxistinê: https://kmr.wordpress.org

Gotara berê:

Gotara piştî:

Şîrove (1)

Şîroveyeke binivîse

NivîskarRêvebir
Dîroka weşanê17/11/2026
KategorîGiştî
Hejmara peyvan667
Dema xwendinê4 deqe xwendin