Ez û Dilbikul Cizîrî Helbestvanê Cizîra Botan

Ji mêj ve, min divîbû şarê Cizîra Botan bibînim. Ne tenê dîtin, lê
belê ku çend rojan jî lê bimînim, lê razêm û çarşiyên wê ji nêzîk ve
bibînim, bi xelkên wê re biaxifim.. Jixwe serdana gora Mem û Zîn,
Melayê Cizîrî, Medreseya Sor, Birca Belek, gora Nebî Nûh xewnek ji
xewnên min bû. Ev navên ku ji mêj ve min bihîstibûn, lê min ew
nedîtibûn, xewin bû ku serdana wan bikim..
Di roja 20ê tebaxê 2008an, li ser daxwaza şaredariya bajarê
Cizîra Botan û serokê wê birêz Aydin Budak, çûm bajarê Cizîra
Botan, da ku beşdariyê di wan rojên çand û hunerê yên bi navê
(Ziman rûmet e û rûmet ziman e) bikim.
Destpêka panela min bi van gotinan bû: "Li ser daxwaza xelkên
Cizîrê, bajarê Cizîrê û serboriya wê ya dîrokî ku landika şaristaniyê
ye.. Li ser daxwaza şêxê nêçîrvanan Mîr Mihema û herdu
pezkoviyên wê; Efno û Hejale.. Li ser daxwaza Mîr Şeref û
medreseya Sor.. Li ser daxwaza meleyê Cizîrî û Selamayê.. Li ser
daxwaza Feqehê Teyran û Ava Dicle.. Li ser daxwaza Ehmedê Xanî û
Mem û Zînê.. Li ser qêrîna Mîr Bedirxanê Botî di Birca Belek de ku
(Dîn dînê Xwedê ye, em tev birayê hevin), yê ku ku biyaniyan di
derheqa wî de gotin: (Bedirxan edalet e û edalet Bedirxan e), û li
ser hawara Xelefê Şûvî: "Ez Xelef im Xelef im Haware Mîro
hawar e.."..
Li bajarê Cizîrê, çav bi helbestvanê wê birêz (Dilbikul Cizîrî)
ketim. Evê ku ala Cizîrî, Xanî û Teyran hildaye ser milên xwe û
qebûl nake Cizîr bê helbestvan bimîne.. Cihê wan bi hunandina
helbestên xwe dadigire.. Min û wî çend rojên xweş bi hev re derbas
kirin.. Piştî ku ez zîvirî Qamişlo, di çûna xwe a Cizîrê û helbestvanê
wê Dilbikulê Cizîrî de ponijîm û min ji xwe re got:
Çiyayên bilind bê teyrên baz nabin.. Geliyên kûr bê av nabin..
Bajarê Cizîra Botan bê helbestvan nabe..
Wek ku kurd dibêjin: Dil li cem dila ye.. Helbestvan Dilbikul Cizîrî
jî, ev helbest li dor naskirina min xwe, di rûpelê xwe de belav kiriye:
(Helbesta Min a der barê Rêzdar Konê Reş de

Konê Reş…
Ronakbîrê me Kurda ye Konê Reş
Bizanin gelkê hêja ye Konê Reş
Ku Kurdistan welatê wî esasî
Lê ew xelkê Rojava ye Konê Reş
Welatperwer û kurdperwer û Kurdhez
Bo xelkê Kurdî Seyda ye Konê Reş
Dema pênûsê kar tînit bi rastî
Kulîlka baxê medya ye Konê Reş
Nivîsên wî dixwînim ez bi lezzet
Bi wî Qamişlo ava ye Konê Reş

Evîndarê Bedirxanên Cizîrî
Di der heq wan de zana ye Konê Reş
Belê her çendi hinkê kal bibit jî
Lê şêrîn şubhê helwa ye Konê Reş
Dixwazim ez temen gelkê dirêj bit
Ji Dilkul bo wî dua ye Konê Reş.
Dilbikul).