În , Gulan 17 2019
Destpêk / Forum / Nivîsxane / Zindankirinên Apo Osman Sebrî Di 114 Saliya Rojbûna Wî De*

Zindankirinên Apo Osman Sebrî Di 114 Saliya Rojbûna Wî De*

Di roja 05.01.2019’an de, (114) sal di ser rojbûna Apo Osman Sebrî re derbas dibe.. Apê ku li dor hezkirina zimanê Kurdî wiha gotiye: (Ev ji bextê me yê reş e. Bav û kalên me gunehkariyeke mezin kirine ku bi zimanê xwe mijûl nebûne. Di welatê me de Ermenî hebûn, Sûryanî hebûn, hindik bûn, lê wan bi zimanê xwe dixwendin. Me diçû bi zimanê Tirkan û Ereban dixwend. Ev hemî sûcê bav û kalên me ne, em hîn nekiribûn. Heye ku rehmetî Celadet nebiwa, dibû ku me bi xwe jî guh nedabiwa vî karê ha. Ji ber ku em ne xwediyê vê fikrê bûn, ev fikir ji wî derket, mala wî hezar carî ava..)

Bi min xweş e, bi vê helkeftinê ez girtin û zindankirinên wî ji we re raxînim ber çavan: Bi damezirandina Al-Partî (P.D.K.S) re, di nav Kurdên Sûriyê de, şiyarbûn û zanînê serê xwe rakirin. Kurdan doza mafên xwe yê netewî û rewşenbîrî kirin.. Lê ew daxwaz û armancên ku Kurdan dixwestin li gor hawê hikûmetên Erebî li Sûriyê nedihatin, vêca dest bi şerê Kurdan kirin, nemaze ew kesên ku Al-Partî damezirandinbûn û yên ku endamên wê bûn. Hikûmetê dest bi girtina wan kir û di serê wan de Apo Osman Sebrî û hevalên xwe bû. Evin, ew çend carên ku Apo Osman Sebrî di gel hevalên xwe, ji rex hikûmetê ve hatine girtin:

1 – Roja 15/08/1960’î, di vê rojê de Osman Sebrî û Dr. Nûreddîn Zaza di gel çil û heşt /48/ endamên Partî hatine girtin û li zindana Helebê û ya Mezê li Şamê mane ta roja 02/02/1962’an.
2 – Di sala 1963’an de Osman Sebrî ji ber hikûmetê revîya çû Libnanê û çend heyvan li wir maye.

3 – Di roja 21/05/1964’an de careke din ew û kurê xwe Hoşeng li Helebê hatine girtin di gel çend hevalên din û di zinadanê de mane ta bi dawiya sala 1965’an.

4 – Di dawiya sala 1965’an de, nû ji zinadanê derketibû, lê careke din li Dêra Zorê hatiye girtin û çend heyvan li zindana wê jî maye.
5 – Di sala 1967’an de dema ji zindanê derketiye hikûmetê ew surgûnî bajarê/ Siwêda/ kirine. Ew bajarê ku li başûrê Sûriyê dikeve û pirraniya xelkên wê Durzî ne.

6 – Di sala 1969’an de, dadegeha dewletê biryar daye ku Osman Sebrî bi du salan zindan bike..  Lê wî xwe ji Sûriyê daye alî û di Tirkiyê re derketiye.. Li Tirkiyê dûm nekiriye, piştî du heyvan zîvirîye Sûriyê, çend heyvan veşartî maye û dawî hatiye girtin û di zindana /Qellhe/ de li Şamê maye ta sala 1970’yan. Di vê girtinê de du avûkatan xwestine di dadgehê de bervedêriya wî bikin, lê ew bi wê bervedêriya wan razî nebûye.. Piştî ku hikmê xwe qedandiye û derketiye li mala xwe a li Şama Şerîf, taxa Kurdan rûniştiye û dest bi fêrbûna zimanê Kurdî kiriye..

Apo Osman Sebrî 18 caran hatiye girtin û zindan kirin, du caran li Tirkiyê, du caran li Libnanê, du caran li Îraqê û 12 caran li Sûriyê û çendîn car jî li Sûriyê hatiye surgûn kirin..

Li ser girtin û zindankirnên xwe wiha bersiva nivîskar Firat Cewerî di kovara Hêvî, hejmara 7’an, payîza 1990’î de daye: (Em di bin destên xelkê de bûn. Gava ku merivek 52 salî be û 18 caran têkeve hepsê, dê çi têde bimîne? Ez 18 caran ketime hepsê.. Carekê hakimekî Ereb ji min re got: (Ev cara çendan e ku tu dikevî hepsê?) Min got: ev cara min ya 17’an e. Hingê ez tenê 17 caran hatibûm girtin. Hakimê ereb got: (Xwedê mala te xera bike..). Min got, bela Xwedê mala we xerab bike. Lawo! Kengî min hatiye li deriyên hepsên we xistine, min gotiye mala min tune ye, cih bidine min..? Hun tên min digirin û davêjin hepsê û di ser de jî mala min xerab bibe! Bela mala we xerab bibe! Gava ku min ev gotin kirin mêrik keniya…).

Konê Reş

*– Ji pirtûka min ya bi navê (Osman Sebrî: Jînenîgarî û Çend Nivîs û Helbestên Nû).

Derbar Konê Reş

Konê Reş

Dikarê vê jî bixwênê

Zimanê Kovara HAWARê Zimanê Axaftina Xelkên Amûdê bû

Di destpêka çerxê bîstan de, bajarê Amûdê tekane bajar bû di Beriya Mêrdînê û Cizîrê …

Bersivekê binivîsin

Your email address will not be published. Required fields are marked *