Şaîr no kitabê xo seba tutan/domananê kurdan dîyarî kerdo:
“seba qijanê/domananê welatê min ê ke
çimanê înan de tîja hêvî şewqîyena…”
kitab de şîîrî hîrê qisim de ameyê têhet:
şaîr destpekerdinê şîîranê xo bi iktîbasê feqîyê teyran keno:
“Nura ronîya tu yî / dûr ji hizûrê ez im…”
Qismo yewin (1): dûr ra ameyîş
Qismo diyin (2): versîye de vindertiş
Qismo hîrêyin (3): û tîya ra şîyayîş
Ne hîrê qismî de pêro pîya vîst (20) şîîrî estî. qisma pêyen de şaîr bi vengê mela ehmedê xasî ke xo rê ustad û kalik vîneno destpêkeno şîîranê peyên:
“Rebbî halê ma bi xo to ra ayan
Lazimey hindî çî ya, vaco ziwan”
Kitab de tema; hîrê qisman de eşkera yo ke wext o. aye ra şaîr vano: dur ra ameyiş yani “ezel”, versîye de vindertiş yanî “dinya” û tîya ra şîyayîş yanî “ebed” ser o awan bîyo. şîîran de zêdêtir “eşq, heskerdin, welat, xeribî, tebîet, dem ra lome, tenayî û rewşa miletê kurdî” şuxulîyayo. seba nê babetan bi veng û ahengê kirdkî-zazakî bi uslubo nerm, bi lîrîzm û mistîsizm fotografê no dem û dewran antîyayo. kitab 2016 de weşanxaneyê vateyî ra vejîyayo.
Nimune :
“Ez zana rîyê erd de nimiteyî yo milkê to
Çend lete bi lete bo zî xanûmanê to
La ti çakuçê kawayî, şîîra melayî
Û vengê evdalê zeynîke
Xo vîr ra meke.
Ez zana bêbextîya şarî to dejnena, tal kena
Şewa to pûk û cemed a nika
La awirê xo sey aşme şewqîyayî estê
Û koyanê berzan ê to de tîjêk şewla dana
Qet xo teng meke.”
Kitab: Wexto vîndîbîyaye
Nûştox: Newzat Valêrî
Weşanxane: Vate