Sêşem , 27 Cotmeh 2020

ŞEWDIRÊ TO B’XEYR XANA MI-ŞÎÎRE

SEBAHULXEYRÎ XANÊ MIN

Şewdirê to b’xeyr xana mi, ziwanşîrin siltana mi
Ti ya hem ruh û cana mi, to rê qurban bo ganê mi
Te’alellah! Çi kes a ti, çi weş şîrinsifet a ti
Çi şeker çi şîrin a ti, yeqîn ruh û heyat a ti

Coy û nefesa canê mi, şewdirê to b’xeyr  siltana mi
Bê mi het roşnîa çiman, bivîna bejn û bala to

Şewdrê to xeyr sermesta mi, dest bi qedehşerbeta mi
Serxwoş û meypersta mi, ti ya meqsûd û qesda mi
Mexseda ra ti bes a mi, berzê çerxê etlasî mi
Bê to kesna nîno ro mi, ê birwê qewsî besê mi

Biskçengalî tim da’fa mi, şewdirê to b’xeyr siltana mi
Bê mi het roşnîa çiman, bivîna bejn û bala to

Ê bisksîya û tayan ra, xwu’b xelisna jî dîlber ra
Çimsîya û zendspan ra, helnaya zey mûm zerrî ra
Zey mûm şekl û şemal a ez, mohbetê to ver lala ez
Zeîf a zey gazlîg a ez, zey koterî nalena ez

Bi bilbil a fîxan kerd mi, şewdirê to b’xeyr  siltana mi
Bê mi het roşnîa çiman, bivîna bejn û bala to

Şew û roj bi bilbil a, ê gulek û xilfan ser da
Çareaşm a şefeqroj a, zey cehnimê to veşnaya
Na dûrîyey mi rê tenya, bedenî ser mi a dîya
Tûr di, Deşta Eymenî ra, tecellî kerd virsê fina

Tim şewate da zerr ya mi, şewdirê to b’xeyr siltana mi
Bê mi het roşnîa çiman, bivîna bejn û bala to

A rindey û weşeya ci, ê destê spey û bejna ci
Çendik bida jî pesnê ci, zerrî finên kewta bi ci
Bêşiûr vista virsê ci, şewq ruwena a taca ci
Şerq û xerb têd kewt şewqê ci, roj ra çinyo qe ferqê ci

Derba eşqa nalîna mi, şewdirê to b’xeyr siltana mi
Bê mi het roşnîa çiman, bivîna bejn û bala to

Zerîf a, nazik a, şên a, wejhorî û pêrîreng a
Ti bi roja beranber a, tîryengî ya birwê sîya
Tîrnewekê ecêban a, ê birwanê bi qewsan a
Xençer’w şûrî ro sînê ma, zey yaxerî varnê ro ma

Ê derbî têd kiştoxê mi, şewdirê to b’xeyr siltana mi
Bê mi het roşnîa çiman, bivîna bejn û bala to

A ki finên xet û bengan, hewad perde û hecalan
Ti veyndê boka evdalan, veynê roşan û sersalan
Destûr bid bi îcazetan, pêrîrenga wejhorîcan
Mey bişmê ma bi bîllûran, şew tarî û mîyanrojan

Talan kerd bengan zerrya mi, şewdirê to b’xeyr siltana mi
Bê mi het roşnîa çiman, bivîna bejn û bala to

Qedehşahi bi qerqef a, şerabnûrîn tey degrota
Nîşanên dîlber ra yena, mi rê her şefaq bi sirr a
Ez şimena a bellor ra, şefaq di serxwoşa ay ra
Mîyankî nê karî kena, qandêk dîlbera xwu veyna

Aya nêbî ki zerrya mi, şewdirê to b’xeyr siltana mi
Bê mi het roşnîa çiman, bivîna bejn û bala to

Ti bê vera Melayê xwu, şehîd û mubtelayê xwu
Ti şefqet ki bi resê xwu, wa Mela nêmro’b dejê xwu
Ti ya Mesîhê nêweşan, mar tepiştî rê ti derman
Şehdê şemşêr û b’xençeran, to kerdî şîlikê tîran

Heyranê to ya zerrya mi, şewdirê to b’xeyr siltana mi
Bê mi het roşnîa çiman, bivîna bejn û bala to

 

 

Melayê Cizîrî

Açarnok: Ö. Faruk Çetinkaplan

Derbar ziman

Avatar

Dikarê vê jî bixwênê

Ciwan Haco: Kes nikare vîna Kurd bişkîne

Ciwan Haco got: “Kurd neteweyek 50 milyonî ne. Îro em çend di rewşek xerab de …

Bersivekê Binivîsêne

Epeyama we nayê weşandin. Qadên pêwist bi * hatine nîşandan.