Çarşem , Kewçêr 18 2017
Malper / Danasîn / Kovar / Kovarnasîn: Psychology Kurdî 4

Kovarnasîn: Psychology Kurdî 4

Bernameya Kovarnasînê

Silav ji we re şopînerên hêja… Em dîsa bi bernameya kovarnasînê li pêşberî we ne. Di vê weşanê de, em ê danasîna hejmara çarem ya Kovara Psychology Kurdîyê bikin.

Hejmara Çarem a Kovara Psychology Kurdî

Kovara pêşîn ya derûnnasîyê bi zimanê Kurdî û birêkûpêk Psychology Kurdî bi hejmara xwe ya çarem derket pêşberî xwendevanên xwe.

Psychology Kurdî, Di hejmara xwe ya pêşî de bi dosyaya “Zarok, Şer û Travmayê” li ser travmaya şer rawestîyabû, Di hejmara duyem de bi dosyaya “Derûndermaniya Travmayê” bêhtir li ser tedawîkirina travmayê rawestîyabû, Di hejmara sêyem de bi dosyaya “Şîn û Şûn”ê derbarê gelek mijarên têkildar de rawestîyabû,Kovar, niha jî di hejmara xwe ya çarem de, bi sermijara “Ziman û Derûniya Perwerdehiyê” weke dosyayekê bi giranî; li ser ziman, xweza û girîngiya zimên, duzimanî û derûniya perwerdehiya bi zimanê dayikê rawestiya ye û wekî din jî me bi naverokeke dewlemend pêşwazî dike.

Koma Psychology Kurdîyê di nivîsa edîtorîyê de wek armanç û hevî dixwaze zimanekî ava bike ku kesekî/ê Kurd dema çû cem derûnnasekî bikaribê derdê xwe baş bîne ziman. Niha kom wek platformeke derûnnasîya Kurdî tevdigerin û di dawîya kovarê de ferhengokeke derûnnasîyê bi zimanê Kurdî, Îngîlîzî û Tirkî weşandîye.

Ji aliyê din ve kovar, diyar dike ku ji ser destpêka weşana kovarê salek derbasbûye û vê sala xwe ya nû bi rûpelsaziyeke nû pêşwazî dike û spasîyên xwe pêşkeşî xwendevanên xwe dike…

Di vê hejmarê de Psychology Kurdîyê bi giranî li ser van mijaran rawestiyaye;

  • Prof. Dr. Jan Îlhan KIZILHAN bi nivîsa xwe ya “Pêwistiya Çareseriya Dîrokî û Derûniya Trawmayê” bi zimanekî zanistî, lêkolînan li ser şîddet, trawma, trawmaya nifşî, takekesî û ya hevpar radiweste.
  • Doç. Alk. Dr. Duygu CANTEKİN bi nivîsa xwe ya “Tendirustiya Derûnî ya Penaberên Sûrî”yê cih dide lêkolîna xwe ya ku li ser tendirustiya derûnî ya penaberên Sûrî yên li Tirkiyê û agahiyên derbarê van penaberan de bi me re parve dike.
  • Vecdi DEMİR bi nivîsa xwe ya “Li ser Tepisandinê” nasîna tepisandinê dike û bi çavekî derûnkolînerî li ser temsîlên tepisandinê, pêvajo û qonaxên wê radiweste.
  • Derûnnas Mihemed Elî ALÛCÎ bi nivîsa xwe ya “Bi Çavekî Derûnkolînerî ‘Xwe’bûn û Nasname”yê avakirina nasname û ‘xwe’bûnê rave dike û pirsgirêkên wê bi nêrîneke derûnkolînerî bi xwendevanan re parve dike.
  • Herwîha kovar bi nivîskar, zimanzan û lêkolîner Deham EBDULFETTAH re hevpeyvîneke balkêş li dar xist. Di vê hevpeyvînê de li ser girîngiya zimanê bav û kalan, derûnî û rola zimên rawestiyan.
  • Luqman GULDIVÊ bi nivîsa xwe ya “Helwêsta Beramberî Ziman û Tecrûbeyên Erênî” behsa xweza û guhestina zimên û helwêsta beramberî zimên dike û girîngiya zimanê dayîkê ji xwendevanan re rave dike.
  • Derûnnas Darius WINZER bi nivîsa xwe ya “Li Ser Zimanê Zikmakî” behsa lêkolînên ku li ser zimanê dayîkê hatine kirin dike û rola zimanê zikmakî bi xwendevanan re parve dike.
  • Derûnbijîşk Dr. Azad DILDAR bi nivîsa xwe ya “Zarokên Bêziman” pênaseya zimên vedibêje û pêşketina zimanê zarokên pêşdibistan û dibistanê, bandorên nêyînî yên perwerdehiya ne bi zimanê dayikê, duzimanî û nîvzimaniyê bi me dide nasîn.
  • Mamosteyê perwerdehiya taybet Wehab ŞEHÎN bi nivîsa xwe ya “Girîngiya Perwerdehî û Hîndekariyê ji bo Astengdaran” armanc û girîngiya perwerdehiyê ji bo kesên astengdar bi xwendevanan re parve dike.
  • Prof. Dr. Cem KAPTANOĞLU bi hevpeyvîneke têr û tijî ya li ser “Derûndermaniya Alîkar” bi me re ye.
  • Derûnnas Samed DOĞAN bi nivîsa xwe ya “Depresyon”ê sedemên depresyonê, nîşêt, vexuyanî û cureyên wê û dermankirina wê ji xwendevanan re dide nasîn.
  • Xwendekara Beşa Derûnnasiyê Jiyan AY bi nivîsa xwe ya “Ceribandina Milgram”ê behsa rê û rêbazên ceribandina Milgram dike û hêza rewşê ya li ser reftariyan vedibêje.
  • Derûnnasê Klinîkî û Terapîstê Zayendî Murat CAYMAZ bi nivîsa xwe ya “Jiyana Zayendî û Mafên Zayendî”yê behsa tendirustî û mijara zayendî, têkiliyên zayendî û danezana mafên zayendî dike.
  • Ji bilî van nivîs û nivîskarên hêja, di vê hejmarê de, danasîna kurtefîlma derhênêr Kadir EMAN û Velit ATAKLI ya bi navê “Baskên Şikestî” jî dikin ku ev kurtefîlm di hêla peyamên civakî û hezkirina ajalan û kesayetiya mirovan de pir bi angaşt e.

Heta bernameyek din a kovarnasînê bi xatirê we…Her bi Kurdî bijîn…

  • Amadekirin: Zanîngeh Medîa
  • Nivîs û Pevxistin: Ridwan Xelîl
  • Serastkirin û Deng: Omer Bextîyar (Sönmez)

Hûn dikarin van nivîsan jî bixwînin.

25 saliya Nûbiharê û 20 saliya Bîrnebûnê

Di dawiya sedsala 19an û destpêka sedsala 20an de çend paytextên cîhanê wek Qahîre û …

Şîroveyek

  1. Bi rastî jî Kovareke ku hêjayî xwendinê, û pêwistiya zimên bi kovarên wisa heye. Destê kedkarên wê sax be.

Leave a Reply

%d bloggers like this: