În , 23 Cotmeh 2020

Keça Kurda- Xizan Şîlan

keça kurda gulîzerê

ez ê

xwe bispêrim hembêza xeyalên

penaber

tûrikê helbesta xwe bi êşa eşqa te

dagirim

û bi gavên şemitok ber bi şopa te ve

bipekim

keça kurda esmerê

ez

heyranê fîstanê sor ya bejn û bala te me

dengê bilbilê bostana te me

derwêşê gerok yê çolistana te me

dengvedana kendalên tarîstana te me

li nav qelebalixa kolanên bajarê te

sêwî mam

di axîn û nalînên sewdaya te de

kal bûm

di tîra bijangên te yên tûj de

hatim kuştin

keça kurda gewrê

tu

şewqa çira tenêtiya oda min î

lezeta guşiyê tirî ya baxê min î

tilîliya qêrîna bêdengiya min î

li dûrî hesreta te

rondikên xwînê diniqutin

ser laşê jiyana stewrbûyî

movikên pişta min

di bin barê hezkirina te de

şikestin

her şev

îskeîska pêlên bayê felekê

dadiqurtînim

xewnereşkên bi xof

xwe li gewriya henasa min

dipêçin

keça kurda çavzeytûnê

te

bi çirûskên agirê awirên melûl

kezeb û gurçik li min

peritandin

ez ê

perdeya demsalên gunehkar

bidirînim

çûka hêlîna dilê xeydok

ber bi stêrka xewnên te ve

bifirînim

bi rengê hineya kefa destê te

keskesora derûniya xwe

ava bikim

hîqehîqa kenê te ya xweşik

di albûma giyanê xwe de

nîgar bikim

keça kurda lêvfîncanê

ez ê

qûntarên çiyayê şengalê

ji te re bikim warê şahî û dîlanan

li perestgeha Laleşa Nûranî

qesîdeyên Yezdanê dilovan

bixwînim

û li dora Tawûsî melek

semaha rojbûna te

bigerînim

keça kurda bêhnqurnefîlê

kulîlkên bêrîkirina min

li ser qefesa te ya gewr

şîn dibin

çokên min

li derbederiya çolbeyarên tenha

kûd û şerpeze bûn

têlên kemanê serxweş

melodiya êşa dûrbûna salên te

dilorîne

sebir

di bin dilopên barana har de

şilopilo bûn

di tunebûna te de

tîrêjên berbangan li eniya xwe

reş girêdan

keça kurda nazdarê

were

deriyê qonaxa eşqa dilê xwe

ji min re veke

bi dermanê tiliyên narîn

jana qolincên min

mist bide

bedena westiyayî

di neynika bedewiya xwe de

vehesîne

kul û birînan

bi bişirînên xunava lêvên hingivî

bikewîne

çemên xweşsohbeta gotinên şîrîn

li ser zimanê lihevgeriyayî

biherikîne

 

 

Xizan Şîlan

2014-08-11

Stockholm

Derbar ziman

Avatar

Dikarê vê jî bixwênê

Ciwan Haco: Kes nikare vîna Kurd bişkîne

Ciwan Haco got: “Kurd neteweyek 50 milyonî ne. Îro em çend di rewşek xerab de …

Bersivekê Binivîsêne

Epeyama we nayê weşandin. Qadên pêwist bi * hatine nîşandan.