Pêncşem , 24 Îlon. 2020

Helbestên ku di pesnê Ala Kurdistanê de hatine nivîsandin

Eger Mîr Emîn Alî Bedirxan û hevalên xwe rengên Alê bijartibin û danîbin û şêx Mehmûdê hefîd, Şêx Abdulselamê Barzanî, Ihsan Nûrî Paşa, Ferzende, Memdûh Selîm Wanlî, Hemze Begê Miksî, Dr. Nuredin Zaza û… li ser giriya bin, eger pêşewa Qazî Mihemed ji bo wê hatibe bidarvekirin û Barzanîyê nemir û hevalên xwe ji bo wê sînorên bi xwîn derbas kiribin ta ku xwe gîhandine Sovyêta berê.. Va îro, bi saya welatîyên dilsoz û birûmet Ala me li ser xaka Kurdistana me bilind, bilind li ba dibe.. Hêvî û xewnên wan gorbuhîştiyan dibin rastî û her bijî Ala Kurdistan, bijî Kurd û Kurdistan. Ji helbestên ku di pesnê Ala Kurdistanê de hatine nivîsandin û belavkirin:

1 – Mîr Celadet Bedirxan, sala 1932an:

Alê Kurdan di nav rok

Çi bedew û bi heybet

Bi çar reng î, rengê te

Çi delal û çi xweşkok

Xêzek kesk û xêzek sor

Nav sipî û nîvek zer

Keskesore bi roje

Ev li jêr û ew li jor..

2 – Mîr Dr. Kamîran Bedirxan, sala 1932an:

Ronahîya dil û çav

Diyarîya dê û bav

Pêsîra wê roj û tav

Spehîtiya ax û av

Ala Kurdan ser bi ser

Sor û gewre kesk û zer

Ala Kurdan ser bi ser

Sor û gewre kesk û zer..

3 – Osman Sebrî, sala 1936an:

Min divê her tu bilind bî

Ala rengîn Kesk û zer

Him xweşî him ceng û rûmet

Tên zanîn ji sor û gewr

Dûr nêzîk ez ê te hildim

Tu yî xemla banê min..

4 – Cegerxwîn, sala 1941ê:

Ala sê rengî tu

Bi nav û dengî tu

Nişan û cengî tu..

Îro, me tu kiriye himbêz

Rojek wê bê, te bikin rêz

Di eywana, li ser bana

Rojên şadî tu xemil û xêz

Kesik û sor û zerî

Ey xortên kurdan

Silavê lê bikin…

5 – Ehmedê Namî, sala 1943an:

Pêşkevin em serfirazin miletê kurdî

Yan mirin dê bibînin, yan jîna kurdî

Bi xwendin û xwendegehan, bi Al û leşker

Dê bijîn paşê dikarin rêçê bibin ser…

6 – Tahayê Mayî, sala 1943an:

Kesk û sora roj li nave

Sipiye befra li welat

Rojeka pir zîv belave

Wextekê zêrên helat..

Ala min her dem li jor e

Şox dibin pê ser çiya

Em dixwazin bo te îro

Tu bijî bo vê nijad…

 

Konê Reş

Qamişlo. 19.12.2018

 

Derbar Konê Reş

Konê Reş

Dikarê vê jî bixwênê

Raweste ezbenî.. te agahdar bikim?!

Carna tu neçar dibî, dergehê mala xwe ji ber bahozê bigire, da ku xewnên te …

Bersivekê Binivîsêne

Epeyama we nayê weşandin. Qadên pêwist bi * hatine nîşandan.