Sêşem , 24 Sermawêz 2020

HEKA LEGLEG

Legleg firî li ezman

Ber bi newal û çeman

 

Dît kevokek li ser dar

Dike gazî û hawar

 

Gote: Xwişkê te xêr e

Te li dil xist wek kêr e

 

Te çi hene derd û xem

Ji bo çi dikî sîtem?

 

Ka bêje tu delalê

Çi sedema vî halê?

 

Kevokê got bi girîn

Bi dilek kul û birîn

 

Gote : Eva bû heft sal

Min belavê ev pergal

 

Çêlik têne ber firê

Dikevin ber nifirê

 

Ji şikeftê tê rovî

Êriş dike bi hovî

 

Tê dide li vir halan

Dike mala min talan

 

Dibê bide tu tevan

Ez ê bixwim b’noşîcan

 

Ew dixwaze çêlikan

Ez didimê giştîkan

 

Ez ji tirs û xofa wî

Her sal dikim bi a wî

 

Dîsa were wê sibe

Wê çêlikan tev bibe

 

Ez neçar û perîşan

Mam bi derd û van êşan

 

Legleg lê ma, heyirî

Gote: Xwişkê megirî

 

Hêlîna te l’ ser dar e

Rovî çawa dikare

 

Hilkişandin dijwar e

Ev çi şixul û kar e?

 

Îca ku hat tu nedê

Karê wî ma li Xwedê

 

Nikare ew bê ser dar

Ev dar we dike sitar

 

Kevok kêfa wê xweş bû

Hingî devê wê beş bû

 

Leglegê jê xatir xwest

Firiya çû devê best

 

Ji şikeftê rovî hat

Bi fen û fût kir xebat

 

Got: Kevoka xweşdelal

Çi ye li gel te ehwal

 

Ez dixwazim aşitî

Qet naxwazim dijbertî

 

Ka çêlikan bide min

Em hember hev ranebin

 

Da em bijîn bi aram

Bi kêfxweşî bê meram

 

Em bi xwişk û biratî

Bijîn li vî welatî

 

Kevokê got: De here

Li şikeftê vegere

 

Êdî nahêm dafikan

Ez nadim te çêlikan

 

Rovî rûnişt fikirî

Li vê rewşê heyirî

 

Got: Ev aqil ne ji te

Kê ev aqil daye te?

 

Ka tu ji bo min bêje

Hê rêka min dirêj e

 

Kevok qure, serfiraz

Bi dengekî xweşawaz

 

Got: Aqilmend legleg e

Ber dilê min leheng e

 

Wa ew li ber devê çem

Diborîne wext û dem

 

Rovî ket rê meşiya

Pûrt ji serî weşiya

 

Li ser rewşê fikirî

Por li xwe kir wek hirî

 

Rovî danî xweş tevdîr

Bi bawerî û bi bîr

 

Çû nêzîk bû li legleg

Got: Heka jîr û leheng

 

Min hene ji te çend pirs

Da ku ji te hildim qurs

 

Tu yî zîrek û zana

Ka şa bike nezana

 

Legleg bi naz û anor

Bi rovî re kire şor

 

Rovî got û dest pê kir:

Ka tu bêje wekî sir

 

Wexta ku tê bayê kur

Tu çi dikî li kepir?

 

Leglegê got: Hêsan e

Ber bi başûr lisdan e

 

Vêca bête bayê şûr

Berî didim bi bakur

 

Bête bayê rojhilat

Bi rojava ye xebat

 

Bête ba ji rojava

Rojhilat cihê çava

 

Rovî got û lê nêz bû

Pirs li pê pirsê rêz bû

 

Ba bête ji çar hêlan

Te ji bo wê çi ye plan

 

Leglegê bo nimûne

Da ku rovî bibîne

 

Got: Ger bête çar alî

Dimelisim dor alî

 

Serê xwe kir bin perran

Firsend da wî wek keran

 

Rovî xwe avête ser

Hustuyê wê kire ber

 

Bû qajeqaj, pirtepirt

Rovî êdî firsend girt

 

Legleg nema tu çare

Ling lê rep bûn wek dar e

 

Rovî gotê bi tinaz

Wax leglega bê miraz

 

Tu bûy alim û zanyar

Lê ji bo te nekir kar

 

Ji xelkê re bûy pispor

Ji bo xwe jî xiltê kor

 

 

Axa Kurdikî

 01.05.2020

About ziman

Avatar

Check Also

Jiyanek Dijwar (Bîranîn-Çand-Çîrok) Ya Suleyman Demirkol

Ez şexsê nivîskarê pirtûka ‘Jiyanek Dijwar’ nas nakim, lê nivîskar Suleiyman Demirkol tiştên di pirtûka …

Bersivekê Binivîsêne

Epeyama we nayê weşandin. Qadên pêwist bi * hatine nîşandan.