Duşem , 28 Îlon. 2020

Eşqa Şeveder Mayî – Xizan Şilan

lê lê gewra çavbelekê

bi kelecana rojên stewr

bêrîkirinên xwe diyarî te dikim

li ber pêlên bayê serê sibehê

li henasa te ya bêhnqurnefilî

digerim

xeyalên şeveder mayî

li ser balgiya qefesa te

radimedînim

xewnereşkên bêxewiyê

li dûmanê cixareya xwe

dipêçim

kovanên çilmisokî

konê xwe di giyanê min de

vegirtine

li şevistanên bêkes

êş û keservedan dibin mêvanê

odeya min

li dûrî hesretkêşiya te

pelên daristana hinavên min

weşiyan

li nav koretariya kendalên dirinde

fermana dîtina bejna te ya fîdanî

derdixim

her şev

di hembêza bêdengiya wêran de

dikevim zikirê

û li perestgeha Laleş

îbadeta pêrgîhatina te dikim

zikat û fitreyên xwe

ji bo çirûskên awirên te yên efsûnî

belav dikim

li bendemana siya gavên te

dil û gurçik li min hatin xwarê

rayên stûyê min qetiyan

qalpaxên kortika çavên kelegirî

qerimîn

rindikê ma çima te

lezeta tiriyên baxê hinarikên xwe

ji min êvişand

nizanim ji te re çi bêjim

li ser zimanê lihevgeriyayî

bêje dişemitin

hevok dilikumin

gotin dixeniqin

toza çolistanên xewle

kumişiyê ser hestên bedena min

pisûla qederê

riya kelem û striyên xopan

nîşanî min dide

xêrnexwazan

li ser dilê reben xençera xwe

tûj kirin

li bajarê êşa hesretê

baskên şadiya demsalên min

şikandin

di bîbikên çavên te yên reşbelek de

lal û gêj bûme

li kolanên xerîbiyê

gilî û gazincên xelk û elemê

dadiqurtînim

gewriya min

di îskeîska tenêtiya rondikan de

fetisî

di tunebûna te de

dîwarê sewdaseriyê

herifî

ava çeman

berovajkî diherike

ewr

dilop dilop xwîn vedirişin

keştiya sebirê

li nav deryaya balûpal asê ma

ez

siwarê axîn û nalîna salên

westiyayî me

tu

şênayiya şevbihêrkên bihara min

ya rengîn î

rindikê were

perdeya cama dilê şermok

ji hezkirina min re veke

bi xunava lêvên peritî

birîna kezeb û cîgera min

bikewîne

peşkên barana payîzên xwe

li ser deşta laşê ziwa bûyî

bibarîne

jana hêsirên xeman rawestîne

bi şewq û şemala rûyê xwe yê mesûm

agirê tenûra hêviyên pûç

geş bike

coş bike

bi xweşikiya dengê xwe ya nermik

kilama ”lawê Misto û sermesto”

di guhên axa tirba min de

bilorîne

 

 

Xizan Şîlan

2013-11-01

Stockholm

Derbar Rêvebirê Çandnameyê

Rêvebirê Çandnameyê

Dikarê vê jî bixwênê

e-Kovara Kurdiyatê Derket

Enstîtuya Zimanên Zindî ya Zanîngeha Wanê di qada akademiyê da ji bo pêşketin û belavbûna …

Bersivekê Binivîsêne

Epeyama we nayê weşandin. Qadên pêwist bi * hatine nîşandan.