Pêncşem , Qanûn 5 2019
Destpêk / Bawerî / Bidet û Xurafe (Xutbe)

Bidet û Xurafe (Xutbe)

 

وَأَنَّ هَذَا صِرَاطِي مُسْتَقِيمًا فَاتَّبِعُوهُ وَلَا تَتَّبِعُوا السُّبُلَ فَتَفَرَّقَ بِكُمْ عَنْ سَبِيلِهِ ذَلِكُمْ وَصَّاكُمْ بِهِ لَعَلَّكُمْ تَتَّقُونَ (153)    

Bawermendên birûmet !

Dînê Îslamê dîneke wisa ye ku temamê jiyana mirovan kiriye di bin venêrînê de. Dînê me temamê baweriya me bi rêk û pêk kiriye. Çiqas tişteke di dîn de pîroz be, çi ji hêla bawerîyê ve be  û çi jî ji hêla îbadetê, her di pirtûkên olî yên bingehîn de cî girtine. Ew tiştên ji bilî wan tiştên ku di pirtûkên olî yên bingehîn de heyîn tev bîdat û xurafe ne. Bîdat ew e ku tişteke di dîn de tune be û pişt re li dîn hatibe zêdekirin. Ew jî çi weke esaseke dînî û çi jî adeteke bi armanc be. Lê heçîkê xurafe ye ew tiştên ku bawerî bi oxirbûn û neoxirbûna wan heye û ji baweriyên çewt in. Kesê misilman carinan di bin bandora wan baweriyên kevin de carinan jî ji nezanî û carînan jî di bin bandora çanda gelên din de dimîne û berê xwe dide wan tiştên ku dînê Îslamê nepejirandiye, bi taybet gava ku neçar û bê hêvî bibe.

Misilmanên birûmet!

Xuda Teala di Qurana pîroz de wiha ferman dike: “Bi rastî ev rêya min e, rêya rast û dirust e, bidin pey wê û nedin pey rêyên din, vêca ew dê we ji rêya Xuda Teala qut bikin. Bi vêya ha we şîret dike, hêvî heye ku hûn xwe biparêzin.”[1] Xuda Teala bi vê ayeta pîroz bi şêwazeke zelal û eşkere dide xuyakirin ku dînekî rast û dirust daye wan. Pêxemberê me jî di hedîseke xwe ya şerîf de wiha dibêje: “ Çi kesê di vî dînê me de tişteke nû ku ne jê ye lê zêde bike ew lê tê  vegerandin.”[2] Ev hedîs dide xuyakirin ku pêwîst e kesê misilman li hember bîdat û xurefayan hişyar be û ku cihê wan jî di dîn de tune ye. Quran û sinet her cûreyên bîdat û xurafayan red dikin. Lewre ji bilî Xuda Teala pê ve kesekî ku xeybê zanibe tune ye. Ji bo vê yekê Xuda Teala fêlbazî û kahinî qedexe kiriye.

Misilmanên birûmet!

Ji wan xurafe û baweriyên çewt dixwazim ji we re çend mînakan bidim: Di rojên diyar de çûyina li ser ziyaretan, maçkirina kevirên tirb û mezelan, serjêkirina heywanan li ser ziyaretan, birina nexweşan li ser ziyaretan hewarxwestina ji miriyan, daleqandina morîkên nezerê bi xanî û erebeyan ve û nezewicandina di navbeyna her du cejnan de. Bila em baş bizanin şîfa derd û derman tev ji Xuda ne û ji wî pê ve jî keseke ku şîfayê jî bide tune ye.

Misilmanên birûmet!

Eger em bixwazin ku dinya û axreta xwe ava bikin bila em ji bîdat û xurafeyan xwe dûr bikin. Dema em li civaka xwe ya îro dinêrin ji ber ku dînê xwe ne ji pirtûkên Îslamê yên bingehîn û zanyarên olî digrin ev bîdat û xurafe di nav civakê de rûniştine. Vêca pêwîst e em di bin rêberiya aqil û ronahiya wehyê de li hember bîdat û xurafeyan têkoşînê bikin. Ez xutbeya xwe bi wateya hedîseke pêxember diqedînim: “Çi kesê gaziya mirovan bike bi bal şop û rêçeke qenc ve weke xêra wan kesên ku emel pê kirine jê re xêr heye bê ku ji xêra wan ên din tiştek kêm bibe û çi kesê gaziya mirovan bike bi bal şop û rêçeke xirab ve jî weke gunehên kesên ku pê emel kirine jê re guneh heye bê ku ji gunehên wan ên din jî tiştek kêm bibe.[3]

Mele Cewadê Girdarî-ÇANDNAME

[1]  El-Enam 153.

[2]  Buxarî silh 5.

[3]  Mislim Îlm 16. H.1373

Derbar ziman

Avatar

Dikarê vê jî bixwênê

Wateya rojîyê çî ye? Girîngiya rojîyê çi ye?

Pêxemberê axirê zeman gotiye, wê gunehên wan mirovan paqij bibin ku bi dil û can …

Bersivekê Binivîsêne

Your email address will not be published. Required fields are marked *