Sêşem , 29 Îlon. 2020

Bi Cana Re Meriv Dibe Can

Dinya ne bi zorê ye, bi dorê ye. Wiha digotin yên berê, wiha dibêjin yên niha û dê wiha bêjin yên bên. Herkes dora xwe dike û diçe.

Ev cîhan eynî mîna dika şanoyê ye. Dibe ku şanoya we qomedî, trajedî û an jî cureyeke din be. Ev yek bi piranî di destên mirovan de ye  û bi qasî mirovan hukimdar jî bandorê li vê rewşê dikin. Lê îro em ê  nekevin nav mijarên tamsar û em ê behsa hukimdaran zordaraya wan nekin.

Jîyana me li gorî tercîhên me şekil digire û li gorî wan tercîhan rêya me an dikeve rêya rast û xweş an jî rêya me dikeve rêya xirab û şaş.

Li gorî tercîhan an em ê bighîjin yaran an jî em ê bighîjin neyaran.

Can, yar û hogir in û her sê jî bi heman esil in. hemû di eslê xwe de heman peyv in. Ew in ku jîyana me rengîn dikin û bi saya waye pêşketina me.

Can in yên ku ava jînê didin me û me ji nû ve can dikin.

Her çiqasî havîrdorê me bablîsok û ececok bin jî stargeha me can e. Bi her awayî û di her xiabîyê de ya derî li me vedike û me dispêrê hembêza xwe dîsa can e.

Can e di her tengasî û zehmetîyê de destên xwe yên ji nûrê dirêjî me dike û me ji wê tengasîyê rizgar dike. Ya ku wekî tav û stêrka di jîyana me diçirise dîsa can e.

Hevalşirîkê jîyana me ye. Di her kêlîka xweş de û di her dîmenên rû biken de wekî dara efsûnî bi hemû heybeta xwe li kêleka me sekinîye.

Demek tê ku êdî her du can bûne yek û her du jî êdî mîna hev in. Di her wextî û di her gavî de ji bona hev cafeda ne.

Hem bi malê xwe û hem jî bi canê xwe herdemî bo hevalê xwe amade ne. Çendîn dereng û çendîn zû jî be bi rehetî meriv dikare here ber derîyê mala canê. Bê tirs û bê guman ew derî dê heta dawîyê ji me re bê vekirin.

Cana ku derîyê dil vekirî û em kirine mêvanê manevîyatê hêjayî hertiştê dinyayê ye.

Di van rojên îroyîn û di vê çerxa xirab de mixabin hejmara van cana kêm bûye û pir nayê dîtin. Lewma şevên me tarîtîr û rojên me bi ewrî derbas dibin. em ketine cihekî wisa ku havîrdor çeqel, dijmin û neyar in. Kesekî xêrxwaz û destgîr di nava wan de tune ye. Ji ber vê yekê gava we canek dît qîmetê wê bizanibin û li hemberî zordaran û di her tengasîyê de dest bidin hev û mil bidin milê hev.

Destên xwe bi hev re dirêjî rojê bikin û wan ewrên tarî biçirînin roja xwe xweş û şeva xwe geş bikin.

 

Mela Mihyedîn

Derbar Mela Mihyedîn

Mela Mihyedîn

Dikarê vê jî bixwênê

Nirxandina Pirtûka Helbestên Occo Mahabad ”RONDIKÊN BINEVŞÊ”

Nirxandin nirx e, qîmet dayîn e. Li cem mirov tiştên bi nirx/qîmet girîng in. Mirov …

Bersivekê Binivîsêne

Epeyama we nayê weşandin. Qadên pêwist bi * hatine nîşandan.